Turmush — Ысык-Көл облусунун Түп районунун 33 жаштагы тургуну Алина Исаева аймактык оорукананын жугуштуу оорулар бөлүмүнүн дарыгери болуп иштеп жатат. Ал Turmush басылмасынын кабарчысы менен болгон маегинде 5 жыл Европада жүргөнүн айтып берди.
Алина Исаева 1991-жылы жарык дүйнөгө келген. Түп айылындагы А.Карымшаков атындагы жалпы билим берүү мектебинин босогосун аттап, 7-класска чейин билим алган. Андан соң лицейде окуп, Бишкек гуманитардык университетинин чет тилдер факультетине тапшырган.
Кийин өз каалоосу менен тандаган кесибин өзгөртүп, максатына жеткенин айтат.
«Үй-бүлөдө 3 бир туугандын кенжесимин. Мектепте билим алып жүргөн мезгилде чет тилин үйрөнүүгө ынтызар болуп, өздөштүрүүгө абдан кызыкчумун. Ошондой болсо да, балалык кыялым ак халатчан дарыгер болууну эңсетип, эки тараптуу тандоо орун алчу. Ошентип лицейде 11-классты аяктап жатканда ЖРТ тапшырып, БГУнун бюджеттик бөлүмүнө чет тилдер факультетине өтүп кеттим. А дегенде 3 жылдай ийгиликтүү окуп, билим алуум өз нугунда жүрүп жатты. Андан кийин балалык кыялым ички сезимимди ойготуп, дарыгер болушум керек деп чечим кабыл алдым. Ошентип кайрадан ЖРТга катышып, Медициналык академияга бюджеттик бөлүмгө өтүп кеттим. Мындай кадамымды ата-энем, жакындарым колдошту. Ошону менен балдар дарыгери адистигин тандап, дагы 6 жыл билим алдым», - деди ал.
Каарманыбыз билим алууну Германиядан улантып, 5 жыл Европада жүргөн.
«Медакадемияны бүткөндөн киийн 1 жыл ординатураны үйрөнүүм керек эле. Тилекке каршы, немис тилин үйрөнүү үчүн окуу программага катышып, Германияга жөнөп кеттим. Тил үйрөнүүнүн аркасы менен 4-5 жылдык тажрыйбамды чет өлкөгө арнап, Нидерландия, Италия, Хорватия жана Словения өлкөлөрүнө саякаттап, курбу кыздарды жолуктурдум. Ар нерсенин аягы болот дегендей, билим алып бүткөн соң кайрадан өз мекениме кайтууну туура көрдүм. Тагыраагы, 2023-жылы Кыргызстанга кайтып, өзүмдүн кичи мекенимдеги аймактык ооруканадан ординатурамды өтөдүм. Анан Түп районунда калып иштөөнү туура көрүп, 1 жылдан бери жугуштуу оорулар бөлүмүндө эмгектенип келе жатам. Жигердүү эмгегимдин аркасы менен райондон «Мыкты дарыгер» деген наам алып, биринчи сыймыгым катары кубанып турам. Келечекте дарыгерлик кесипти улантам. Калктын саламаттыгы башкы орунда, ак кызматымды кылып, элдин батасын алганга бар күчүмдү жумшайм», - деп сөзүн жыйынтыктады Исаева.
